୨୫ଟି ସ୍କୁଲରେ କାମ କରି ୧୩ ମାସରେ ଦରମା ନେଇଛନ୍ତି ୧ କୋଟି : ଗିରଫ ହେଲା ପରେ ପଦାକୁ ଆସିଲା ଶିକ୍ଷିୟତ୍ରୀଙ୍କ କାରନାମା

ଲକ୍ଷ୍ନୌ: ଏମିତି ଶିକ୍ଷକ ବା ଶିକ୍ଷିକାଙ୍କ ବିଷୟରେ ଆପଣ ଆଗରୁ ଆଦୌ ଶୁଣି ନ ଥିବେ । ସେ ଏକା ବେଳକେ ୨୫ଟି ସ୍କୁଲରେ ଶିକ୍ଷିକା ରୂପେ କାର୍ଯ୍ୟ କରୁଥିଲେ ଓ ଗତ ଫେବୃଆରୀ ମାସ ପର୍ଯ୍ୟନ୍ତ ୧୩ ମାସରେ ମୋଟ ୧ କୋଟି ଟଙ୍କା ରୋଜଗାର କଲେ । କହିବା ବାହୁଲ୍ୟ ଯେ ମାମଲାଟି ଗୋଟିଏ ହେରାଫେରୀ ଥିଲା, ଆଉ ଶେଷରେ ଏହି ଶିକ୍ଷିକା ଗିରଫ ହେଲେ ।

ନିଜ ନାମ ଅନାମିକା ଶୁକ୍ଳା ବୋଲି ଲେଖି ୨୫ଟି କସ୍ତୁରବା ଗାନ୍ଧି ବାଳିକା ବିଦ୍ୟାଳୟରେ କାମ କରୁଥିବା ଦର୍ଶାଇ ପ୍ରତି ମାସ ୨୫ ଥର ଦରମା ପାଇଥିବା ଏହି ଯୁବତୀଙ୍କର ବାସ୍ତବରେ ଅନେକ ନାମ ଅଛି ବୋଲି ‘ଅମର ଉଜାଲା’ରେ ପ୍ରକାଶିତ ଖବରରେ କୁହାଯାଇଛି । ଉତ୍ତର ପ୍ରଦେଶର ରାୟବରେଲିରେ ପ୍ରଥମେ ଏହି ମାମଲା ସାମନାକୁ ଆସିବା ପରେ ସେଠାକାର ଶିକ୍ଷା ବିଭାଗର ଅଧିକାରୀମାନେ ତଦନ୍ତ ଆରମ୍ଭ କଲେ ଓ ଅନାମିକା ଶୁକ୍ଳା ନାମ ସହିତ ସମାନ ବ୍ୟକ୍ତିଗତ ତଥ୍ୟ ଥିବା ବ୍ୟକ୍ତି ଏକା ସାଙ୍ଗରେ ୨୫ଟି ସ୍କୁଲରେ କାର୍ଯ୍ୟରତ ବୋଲି ଜାଣିଲେ ।

ପ୍ରଥମେ ଅନାମିକାଙ୍କ ଦରମା ବନ୍ଦ କରିଦିଆଗଲା ଓ ତାଙ୍କୁ ଶିକ୍ଷା ବିଭାଗ କାର୍ଯ୍ୟାଳୟରେ ଆସି ହାଜର ହେବାକୁ ନୋଟିସ ପଠାଗଲା । କିଛି ଦିନ ଏହି ନୋଟିସକୁ ଅଣଦେଖା କରି ସେ ଶେଷରେ ଶନିବାର ଦିନ ନିଜ ଇସ୍ତଫା ଦେବାକୁ କାଶଗଞ୍ଜ ଜିଲ୍ଲା ଶିକ୍ଷାଧିକାରୀଙ୍କ କାର୍ଯ୍ୟାଳୟକୁ ଆସିଥିବା ବେଳେ ତାଙ୍କୁ ଗିରଫ କରିନିଆଗଲା ।

ସବୁ ଠାରୁ ଆଶ୍ଚର୍ଯ୍ୟର କଥା ଏହା ଯେ ଏହି ଯୁବତୀ ବର୍ତ୍ତମାନ ବିଏଡ୍‌ (BEd) ପଢ଼ୁଛନ୍ତି । ପୋଲିସର ପଚରାଉଚରା ବେଳେ ସେ ନିଜ ନାମ ଅନାମିକା ଶୁକ୍ଳା ଓ ଅନାମିକା ସିଂ କହିଥିଲେ, ପୁଣି ନିଜ ନାମ ପ୍ରକୃତ ନାମ ପ୍ରିୟା ଜାଟଭ୍‌ ବୋଲି କହିଛନ୍ତି । ଅନୁସନ୍ଧାନରୁ ଜଣା ପଡ଼ିଛି ଯେ ପ୍ରିୟା ଗତ ବର୍ଷ ବିଏସସି (BSc) ପଢ଼ୁଥିବା ବେଳେ ମୈନପୁରୀ ଜିଲ୍ଲାର ରାଜ୍‌ ନାମକ ଯୁବକ ସହ ମିଶି ତାଙ୍କୁ ଏକ ଲକ୍ଷ ଟଙ୍କା ଦେଇ ସରକାରୀ ସ୍କୁଲରେ ଶିକ୍ଷିକା ଚାକିରି ପାଇଗଲେ । ନିଜ ଶିକ୍ଷାଗତ ପ୍ରମାଣପତ୍ର ଓ ଆଧାର କାର୍ଡ଼ ଆଦି ରାଜଙ୍କ ସହ ମିଶି ଜାଲି ବନେଇଲେ ଓ ୨୫ଟି ସ୍କୁଲରେ ଶିକ୍ଷିକା ରୂପେ ଚାକିରି କରୁଥିବେ ଦର୍ଷେଇଲେ ।

ଏବେ ଏହି ମାମଲାର ତଦନ୍ତ ଜାରୀ ଅଛି । ଉତ୍ତର ପ୍ରଦେଶରେ ଶିକ୍ଷକ ଶିକ୍ଷୟତ୍ରୀମାନେ ପ୍ରେରଣା ନାମକ ଏକ ଆପରେ ନିଜ ଉପସ୍ଥାନ ଦୈନିକ ଦେଉଥିବା ସତ୍ତ୍ୱେ ଏମିତି ହେରାଫେରି କେମିତି ଏତେ ଦିନ ଚାଲିଲା ତାହା ଉପରେ ପ୍ରଶ୍ନ ଉଠିଛି । ଏଥିରେ ଶିକ୍ଷା ବିଭାଗର ଅଧିକାରୀମାନେ ସାମିଲ ଥିବା ବି କୁହାଯାଉଛି ।

Leave a Reply

Your email address will not be published. Required fields are marked *