ଯାଜପୁରରେ ଦୁଇ ଜଣ ଯୁବତୀ ପରସ୍ପରକୁ ବାହା ହେଲେ : ପରିବାରରୁ ଧମକ ମିଳିବା ପରେ ଥାନାର ହେଲେ ଦ୍ୱାରସ୍ଥ

ପରସ୍ପରକୁ ଦୁଇ ବର୍ଷ ଧରି ଭଲପାଇବା ପରେ ବିବାହ କଲେ ଦୁଇ ଯୁବତୀ । ହେଲେ ବିବାହର ସପ୍ତାହକ ପରେ ସେମାନଙ୍କ ପରିବାର ତରଫରୁ ଆସିଲା ଧମକ ଚମକ । ଏବେ ଏହି ସମଲିଙ୍ଗୀ ଦମ୍ପତି ନିଜ ସୁରକ୍ଷା ପାଇଁ ପୋଲିସର ଦ୍ୱାରସ୍ଥ ହୋଇଛନ୍ତି ।

ଯାଜପୁର ଜିଲ୍ଲାର ଶୁଭଲକ୍ଷ୍ମୀ ପତି (୨୨ ବର୍ଷ) ଓ ଲଷ୍ମୀପ୍ରିୟା ମିଶ୍ର (୨୧ ବର୍ଷ) ପରସ୍ପରକୁ ଭଲ ପାଇ ବସିଲେ ଓ ବାହା ହେଲେ । ହେଲେ ଏବେ ଏହି ସମଲିଙ୍ଗୀ ସମ୍ପର୍କକୁ ପାରିବାରିକ ସ୍ୱୀକୃତି ମିଳୁ ନାହିଁ, ବରଂ ଉଭୟ ପରିବାର ତରଫରୁ ଧମକ ମିଳୁଛି ବୋଲି ଦୁହେଁ କହିଛନ୍ତି ।
ଦୀର୍ଘ ଦୁଇ ବର୍ଷ ଧରି ଉଭୟ ଯୁବତୀଙ୍କ ମଧ୍ୟରେ ପ୍ରେମ ସମ୍ପର୍କ ଥିଲା । ତା’ ପରେ ଦୁହେଁ ଜାନୁଆରୀ ୨ ତାରିଖରେ ପ୍ରଥମେ ମନ୍ଦିରରେ ଓ ତା’ପରେ କୋର୍ଟରେ ବିବାହ କରିଛନ୍ତି ।
‘‘ଆମେ ପରସ୍ପର ସହିତ ଖୁବ୍ ଖୁସିରେ ଅଛୁ । ସମଲିଙ୍ଗୀ ବିବାହକୁ ସୁପ୍ରିମ୍ କୋର୍ଟ ବି ମାନ୍ୟତା ଦେଇଛନ୍ତି । ତେଣୁ କେଉଁଠି କିଛି ଅସୁବିଧା ନାହିଁ । ହେଲେ ଆମ ପରିବାର ଲୋକେ ଏ ପର୍ଯ୍ୟନ୍ତ ବୁଝୁନାହାନ୍ତି ଓ ଆମକୁ ହଇରାଣ କରୁଛନ୍ତି,’’କହିଛନ୍ତି ସ୍ୱାମୀ ଭୂମିକାରେ ଥିବା ଲଷ୍ମୀପ୍ରିୟା ମିଶ୍ର ।
ସ୍ତ୍ରୀ ଭୂମିକାରେ ଥିବା ଶୁଭଲଷ୍ମୀ ପତି କହିଛନ୍ତି, ‘‘ଆମ ପରିବାର ଏବେ ଆମକୁ ଜୀବନରୁ ମାରିଦେବେ ବୋଲି କହୁଛନ୍ତି । ଆମେ ନିଜ ଜୀବନ ପ୍ରତି ବିପଦ ଅଛି ବୋଲି ଅନୁଭବ କରୁଛୁ ଓ ପୋଲିସ ଠାରୁ ସୁରକ୍ଷାର ଗୁହାରୀ କରୁଛୁ । ଆମେ ତ ଉଭୟ ସାବାଳକ । ତେଣୁ ଆମକୁ ଆମ ବାଟରେ ଛାଡ଼ି ଦିଆଯିବା ଉଚିତ ।’’
ଏହି ସମଲିଙ୍ଗୀ ଦମ୍ପତି ଏବେ ନିଜର ସୁରକ୍ଷା ଓ ନ୍ୟାୟ ପାଇଁ ଦାନଗଦି ଫାଣ୍ଡିରେ ଆଶ୍ରୟ ନେଇଛନ୍ତି ।
ସ୍ତ୍ରୀ ଭୂମିକାରେ ଥିବା ଶୁଭଲକ୍ଷ୍ମୀ ପତି ଜଖପୁରା ଥାନା ଅନ୍ତର୍ଗତ ରାବଣା ଗ୍ରାମର ଶ୍ରୀଧର ପତିଙ୍କ ଝିଅ । ସେ ଦାନଗଦି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ସିକ୍ୟୁରିଟି ଗାର୍ଡ଼ ଭାବେ କାର୍ଯ୍ୟ କରନ୍ତି ।
ସ୍ୱାମୀ ଭୂମିକାରେ ଥିବା ଲଷ୍ମୀପ୍ରିୟା ମିଶ୍ର କୋରେଇ ଥାନା ଅନ୍ତର୍ଗତ ଚାନ୍ଦମା ଗ୍ରାମର ସୁରେନ୍ଦ୍ର ମିଶ୍ରଙ୍କ ଝିଅ ।
ଏହି ସମଲିଙ୍ଗୀ ବିବାହକୁ ନେଇ ଲକ୍ଷ୍ମୀପ୍ରିୟାଙ୍କ ବାପା ବି କୋରେଇ ଥାନାରେ ଏକ ଲିଖିତ ଅଭିଯୋଗ କରିଛନ୍ତି । ଏହି ଅଭିଯୋଗ ମୁତାବକ ଦୁଇ ସମଲିଙ୍ଗୀ ପରପ୍ପରକୁ ବିବାହ କରି ଦାନଗଦି ଅଞ୍ଚଳରେ ରହୁଥିଲେ । ଏବେ ସେମାନଙ୍କ ଜୀବନ ପ୍ରତି ବିପଦ ଥିବାରୁ ଦାନଗଦି ଫାଣ୍ଡିରେ ଅଭିଯୋଗ କରିଥିବା ସେ କହିଛନ୍ତି ।
କୋରେଇ ଥାନା ପୋଲିସ ଏହି ମାମଲାର ତଦନ୍ତ ଜାରି ରଖିଥିବା ବେଳେ ଏହି ଘଟଣା କଳିଙ୍ଗନଗର ଶିଳ୍ପାଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।

Facebook Comments

Leave a Reply

Your email address will not be published. Required fields are marked *